«O‘zbek geologiya qidiruv» aksiyadorlik jamiyati

Tog‘-kon sanoati va geologiya vazirligi tarkibidagi "O‘zbek geologiya qidiruv" aksiyadorlik jamiyati aerogeofizik tadqiqotlarni amalga oshirish uchun TOP kompaniyalari sirasiga kiruvchi dunyoning eng yirik global yetakchisi hisoblangan “Xcalibur Smart Mapping” kompaniyasi bilan istiqbolli maydonlarni aniqlashga qaratilgan qo‘shma hamkorlik shartnomasini imzoladi. Mazkur strategik bitim mamlakatimizning geologiya-qidiruv ishlarida zamonaviy usullarni joriy qilish, xususan ilg‘or aerogeofizika uskunalari va sun’iy intellekt orqali yer osti boyliklarini hamda yangi ma’danli konlarni ochish uchun istiqbolli maydonlarni bir necha barobar tez aniqlash imkonini beradi. Qo‘shma loyiha doirasida O‘zbekistonning geologik jihatdan murakkab va hali to‘liq o‘rganilmagan, yer qarining chuqur sathlarini, tog‘li hamda cho‘l hududlarini "Xcalibur Smart Mapping" kompaniyasining maxsus geofizik uskunalari bilan jihozlangan xavo kemalari orqali aerogeofizik ishlari amalga oshiriladi. Loyiha faqat ma’lumot yig‘ish bilan cheklanib qolmaydi. Hamkorlik doirasida havodan olingan ulkan hajmdagi geofizik ma’lumotlar Xcalibur kompaniyasining ilg‘or sun’iy intellekt va mashinali o‘qitish algoritmlari yordamida raqamli formatga o‘tkaziladi. Natijada, O‘zbekistonning geologik maydonlarining mukammal raqamli 3D modellari yaratilib, burg‘ilash quduqlarini qayerda va qanday chuqurlikda o‘tish kerakligi aniq ilmiy asoslab beriladi. Bu esa qidiruv sarf-xarajatlarini va vaqtni keskin tejaydi. Bugungi kunda Tog‘-kon sanoati va geologiya vazirligi oldida mamlakatimizning mineral-xomashyo salohiyatini mustahkamlashni jadallashtirish hamda sohani xalqaro talablar, zamonaviy texnologiyalar asosida rivojlantirishdek g‘oyat dolzarb vazifa turibdi. "Xcalibur Smart Mapping" bilan yo‘lga qo‘yilgan hamkorlik bu boradagi strategik qadamlarimizdan biridir. Ushbu shartnoma ilg‘or aerogeofizik texnologiyalarni amaliyotga joriy etish, yangi istiqbolli kon maydonlarini aniqlash va geologiya-qidiruv ishlarini tizimli rejalashtirishda yangi marralarni ochadi. Ishonchim komilki, aksiyadorlik jamiyat geologlarining ko‘p yillik tajribasi hamda xorijiy hamkorlarimizning ilg‘or texnologik imkoniyatlari uyg‘unligi kelajakdagi yirik sarmoya loyihalari uchun poydevor bo‘lib xizmat qiladi.“ – dedi Shamsiddin Alimov. “O‘zbek geologiya qidiruv” AJ va xorijiy hamkorlar qayd etganidek, ushbu loyihadan olingan yuqori sifatli geologik ma’lumotlar xalqaro standartlarga ESG tamoyillariga to‘liq mos keladi. Bu esa kelgusida Respublikamizning tog‘-kon sektoriga xorijiy investorlarni va yirik tog‘-kon korporatsiyalarini minimal xatarlar bilan jalb qilishda eng kuchli va ishonchli vositaga aylanadi. Shuningdek, dasturda magnit, radiometrik va iCORUS-iX skalyar gravimetrik tadqiqotlar samolyotga o‘rnatilgan TEMPEST™ hamda vertolyotda qo‘llaniladigan HeliTEM™ vaqt sohasidagi elektromagnit tadqiqotlari, shuningdek FALCON™ havo gravitatsion gradiyentometriyasi bilan birlashtiriladi. Olingan ma’lumotlar geologik talqin va foydali qazilmalarni keyingi izlash uchun istiqbolli maydonlarni aniqlashga yordam beradi. Ushbu texnologiyalarning ayrimlari Markaziy Osiyodagi mintaqaviy aerogeofizik xaritalash dasturida ilk bor qo‘llaniladi. Qo‘shma hamkorlik loyihasi doirasida, O‘zbekistonlik yosh geologlar va muhandislar uchun geofizika ma’lumotlarini qayta ishlash bo‘yicha xalqaro malaka oshirish va tajriba almashish dasturlari hamda treninglar tashkil etilishi belgilangan.

“O‘zbek geologiya qidiruv” AJ Markaziy apparatida “Geological Survey of Finland” (Finlyandiya geologiya xizmati) hamda “EGS partners” xalqaro tashkilotlari vakillari bilan uchrashuv o‘tkazildi. Uchrashuvda Tog‘-kon sanoati va geologiya vazirligi mas’ul xodimlari, jamiyat rahbariyati hamda xalqaro tashkilot vakillari   ishtirok etishdi. Mazkur uchrashuv mamlakatimiz tog‘-kon sanoati va geologiya sohasiga ilg‘or xalqaro tajriba, zamonaviy raqamli texnologiyalar hamda innovatsion yechimlarni jalb etish yo‘lidagi muhim qadam bo‘ldi. Tasdiqlangan dasturga muvofiq, xalqaro ekspertlar tashrifi faqat muzokaralar bilan cheklanib qolmay, keng qamrovli amaliy jarayonlarni ham o‘z ichiga oladi.

O‘zbekiston Respublikasining “Kasaba uyushmalari to‘g‘risida”gi Qonuni hamda kasaba uyushmalarining ustavlariga muvofiq, kasaba uyushmasi a’zolari bir qator huquq va imkoniyatlarga ega.Jumladan, ular:mehnat huquqlari va qonuniy manfaatlarini himoya qilishda huquqiy yordam olish;kasaba uyushmasi faoliyatida ishtirok etish, saylash va saylanish;uyushma faoliyati hamda moliyaviy mablag‘lar sarfi haqida axborot olish;belgilangan tartibda moddiy yordam va ijtimoiy xizmatlardan foydalanish;o‘z xohishiga ko‘ra kasaba uyushmasi a’zoligidan chiqish huquqiga ega.Kasaba uyushmasi — xodimlarning mehnat huquqlari, ijtimoiy-iqtisodiy manfaatlari va qonuniy manfaatlarini himoya qilishda muhim tayanchdir.O‘z huquqlaringizni biling va ulardan samarali foydalaning!

Har bir xodim xavfsiz mehnat muhiti, hurmat va teng munosabatga haqli. Tazyiq, kamsitish, haqorat va zo‘ravonlik holatlarining oldini olish, murojaatlarni xolis ko‘rib chiqish hamda jabrlanganlarni himoya qilish — muhim vazifamizdir. Unutmang: har bir xodim — qadriyat, har bir murojaat — e’tibor! #XavfsizMehnat #MehnatHuquqlari #Zo‘ravonlikkaYo‘lYo‘q

“Navoiy kon-metallurgiya kombinati” AJ buyurtmasiga asosan, “O‘zbek geologiya qidiruv” AJ Markaziy geologiya-geofizika ekspeditsiyasi Aerogeofizika partiyasi mutaxassislari tomonidan Pistali koni atrofidagi hududlarda yuqori aniqlikdagi geofizik tadqiqotlar olib borilmoqda. Loyiha doirasida umumiy maydoni 94 km² bo‘lgan hududda 1:5000 masshtabdagi batafsil aeromagnit suratga olish ishlari amalga oshirilmoqda.Mazkur tadqiqotlar geologik tuzilmalarni aniqlash, yer qa’rining chuqur qatlamlari haqidagi ma’lumotlarni olish hamda foydali qazilma konlarini bashorat qilish samaradorligini oshirishga xizmat qiladi. Dala tadqiqotlarining tezkorligi, o‘lchov natijalarining sifati va aniqligini ta’minlash maqsadida zamonaviy texnologik yechimlardan foydalanilmoqda. Jumladan:Uchuvchisiz uchish apparati: santimetr darajasidagi aniqlikni ta’minlovchi RTK navigatsiya tizimi bilan jihozlangan DJI Matrice 350 RTK droni;O‘lchash uskunasi: yuqori sezgirlikka ega zamonaviy Geometrics MagArrow aeromagnitometri.Ushbu innovatsion texnologiyalar majmuasi yordamida mutaxassislar murakkab relyef sharoitlarida ham xavfsiz, tezkor va yuqori unumdorlik bilan ish olib bormoqda.Hozirgi vaqtda kunlik o‘rtacha ish hajmi 5 km² yoki 100 p.k. tashkil etmoqda. Bu esa tadqiqotlarni belgilangan muddatlarda, yuqori aniqlikda va zamonaviy geofizik tadqiqotlar talablariga muvofiq bajarish imkonini bermoqda.Zamonaviy dron texnologiyalarini geologiya-qidiruv ishlariga joriy etish dala tadqiqotlari samaradorligini oshirish, geofizik ma’lumotlarning sifatini yaxshilash hamda istiqbolli ma’danli hududlarni aniqlashda muhim ahamiyat kasb etadi.

Analitik laboratoriyalar majmuasida Favqulodda vaziyatlar boshqarmasi xodimlari bilan hamkorlikda “Aholini zilzilaga tayyorlash haftaligi” doirasida targ‘ibot tadbiri o‘tkazildi. Tadbirda xodimlarga zilzila vaqtida to‘g‘ri harakat qilish, xavfsizlik qoidalariga rioya etish, evakuatsiya tartibi hamda jabrlanganlarga birinchi yordam ko‘rsatish bo‘yicha tushuntirishlar berildi. Tadbirning asosiy maqsadi xodimlarning favqulodda vaziyatlarga tayyorgarligini oshirish va xavfsizlik ko‘nikmalarini mustahkamlashdan iborat.

Toshkent markaziy geologiya qidiruv ekspeditsiyasida 19–26-oktabr kunlari “Aholini zilzilaga tayyorlash haftaligi” doirasida targ‘ibot tadbirlari o‘tkazilmoqda. Toshkent viloyati FVB bilan hamkorlikda xodimlarga zilzila vaqtida to‘g‘ri harakatlanish, xavfsiz joyga evakuatsiya qilish hamda favqulodda vaziyatlarda xavfsizlik qoidalariga rioya etish bo‘yicha tushuntirishlar berildi. Shuningdek, mavzuga oid videolavhalar namoyish etildi. Mazkur tadbirlar xodimlarning zilzilaga tayyorgarligini oshirish va favqulodda vaziyatlarda to‘g‘ri harakatlanish ko‘nikmalarini shakllantirishga xizmat qiladi.

Hisor markaziy geologiya qidiruv ekspeditsiyasida “Aholini zilzilaga tayyorlash haftaligi” doirasida targ‘ibot-tashviqot tadbiri tashkil etildi. Tadbir Favqulodda vaziyatlar vazirligining Shahrisabz shahar hududiy bo‘linmasi mutaxassislari hamkorligida o‘tkazilib, unda ekspeditsiyaning muhandis-texnik va ishchi xodimlari ishtirok etdi. Tadbir davomida zilzila vaqtida xavfsizlik qoidalariga rioya qilish, favqulodda vaziyatlarda to‘g‘ri harakatlanish hamda aholi xavfsizligini ta’minlash bo‘yicha tushuntirishlar berildi. Tadbir xodimlarning zilzilaga tayyorgarligini oshirish va xavfsizlik madaniyatini yuksaltirishga xizmat qildi.

Yoshlar o‘rtasida sog‘lom raqobat muhitini shakllantirish, ularning intellektual salohiyatini oshirish hamda zamonaviy bilimlarini mustahkamlash maqsadida “O‘zbek geologiya qidiruv” aksiyadorlik jamiyati tomonidan joriy yilning 24-oktyabr kuni “Yilning eng faol yosh geologi” va “Yilning eng faol yosh muhandis-texnik xodimi” ko‘rik-tanlovining respublika bosqichi yuqori saviyada o‘tkazildi. Mazkur bellashuvda Jamiyat tasarrufidagi barcha markaziy ekspeditsiyalar va laboratoriyalardan saralab olingan eng iqtidorli, bilimli va shijoatli yosh mutaxassislar bosh sovrin uchun o‘zaro kuch sinashdilar.Ushbu tanlovni tashkil etishdan ko‘zlangan bosh maqsad — Yangi O‘zbekiston sharoitida geologiya sohasini raqamlashtirish va transformatsiya qilish jarayonlarining asosiy harakatlantiruvchi kuchi bo‘lgan yosh kadrlarni aniqlash hamda ularni har tomonlama rag‘batlantirishdir. Shuningdek, yoshlarning bo‘sh vaqtlarini mazmunli tashkil etish bilan birga, ularning dadil ilmiy tashabbuslari va innovatsion g‘oyalarini ishlab chiqarishga integratsiya qilish uchun erkin maydon yaratishni maqsad qilgan.Tanlovning har bir nominatsiyasi soha kelajagi uchun strategik ahamiyatga ega bo‘lgan yo‘nalishlarni qamrab oldi:“Yilning eng faol yosh geologi” — ushbu yo‘nalish yosh geologlarning tog‘ jinslarini tahlil qilish, yangi istiqbolli konlarni aniqlash hamda mineral-xomashyo bazasini kengaytirishdagi nazariy va amaliy bilimlarini sinovdan o‘tkazdi. Bu yo‘nalish yoshlarga yer osti boyliklarini qidirishda eng so‘nggi geoinformatika va zamonaviy xalqaro standartlardan foydalanish ko‘nikmalarini namoyish etish imkonini berdi.“Yilning eng faol yosh muhandis-texnik xodimi” — bugungi kunda sohaga chet el ilg‘or texnologiyalari va yuqori texnologik burg‘ilash uskunalari kirib kelayotgan bir davrda, ushbu yo‘nalish ishtirokchilarning texnika tili bilan ishlash, innovatsion yechimlarni qo‘llash hamda ish unumdorligini oshirish borasidagi mahoratini yuzaga chiqardi. Murosasiz bahslar yakunida har ikki yo‘nalish bo‘yicha g‘olib va sovrindorlar aniqlanib, ular Jamiyat rahbariyati hamda Kasaba uyushmasi tomonidan qimmatbaho esdalik sovg‘alari, diplom va pul mukofotlari bilan tantanali ravishda taqdirlandilar.Tadbir yakunida “O‘zbek geologiya qidiruv” AJ Boshqaruv raisi Shamsiddin Alimov mutaxassislarni taklif va fikr-mulohazalarini tinglab, yoshlarni har tomonlama qo‘llab-quvvatlash, “ustoz-shogird” an’analarini mustahkamlash va intellektual salohiyatli yangi avlod kadrlarini tarbiyalash borasidagi ishlarni bundan keyin ham izchil davom ettirilishini ta’kidlab o‘tdi.