Togʻ-kon sanoati va geologiya vazirligi хodimlari uchun oʻquv-amaliy seminar boʻlib oʻtdi

“O‘zbek geologiya qidiruv” AJ tarkibidagi Toshkent markaziy geologiya qidiruv ekspeditsiyasida Togʻ-kon sanoati va geologiya vazirligi хodimlari uchun oʻquv-amaliy seminar tashkil etildi. Seminar doirasida dastlab Olmaliq dala ekspeditsiyasi faoliyati va uning tarixi haqida qisqacha maʼlumot berildi. Shundan soʻng ishtirokchilar Miskon koniga tashrif buyurib, geologiya-qidiruv jarayonlari bilan yaqindan tanishishdi.

Amaliy qismda burgʻilash quduqlaridan olingan kern namunalari boʻyicha ishlash tartibi, ularni hujjatlashtirish, namunalar olish va maydalash jarayonlari koʻrsatildi.
Kunning ikkinchi qismida seminar qatnashchilari Sharqiy-Qurama dala ekspeditsiyasiga tashrif buyurib, u yerda laboratoriya kompleksining ish faoliyati bilan tanishishdi. Tashrif yakunida esa Sharqiy-Qurama dala ekspeditsiyasining tarixi va bugungi kundagi faoliyati haqida taqdimot oʻtkazildi.

Bu kabi seminar togʻ-kon sohasi mutaxassislari oʻrtasida tajriba almashish, yangi bilimlarni amaliyotga tatbiq etish hamda geologiya-qidiruv ishlari samaradorligini oshirishga xizmat qiladi.