Samarqandda C5+1 doirasida mineral resurslar va tog‘-kon sanoatiga bag‘ishlangan sessiya bo‘lib o‘tdi

2026-yil 19-oktabr kuni Hilton Samarkand Regency mehmonxonasida C5+1 biznes-forumi doirasida “Mineral resurslar va tog‘-kon sanoati” mavzusidagi tarmoq sessiyasi bo‘lib o‘tdi.

Tadbirda Markaziy Osiyo davlatlari va AQSh davlat idoralari, xalqaro moliya institutlari, tog‘-kon va texnologiya kompaniyalari vakillari, investorlar hamda soha ekspertlari ishtirok etdi. Sessiya AQSh Davlat kotibi Marko Rubio boshchiligidagi Amerika delegatsiyasining tashrifi doirasida tashkil etildi.

Muhokamani ochib bergan O‘zbekiston Respublikasi Tog‘-kon sanoati va geologiya vaziri Bobur Islomov sohani rivojlantirishning ustuvor yo‘nalishlari hamda mamlakatning investitsiyaviy imkoniyatlari haqida ma’lumot berdi. U amalga oshirilayotgan islohotlar, yer qa’ri to‘g‘risidagi qonunchilikning takomillashtirilishi, zamonaviy texnologiyalar va uzoq muddatli investitsiyalarni jalb etish masalalariga alohida e’tibor qaratdi.

Geologiya-qidiruv ishlarini rivojlantirish va yangi konlarni o‘zlashtirish, tog‘-kon korxonalarini modernizatsiya qilish, mineral xomashyoni chuqur qayta ishlash hamda muhim strategik minerallar yo‘nalishini kengaytirish sessiyaning asosiy mavzulari bo‘ldi. Shuningdek, qo‘shma korxonalar tashkil etish, uskunalarni mahalliylashtirish, malakali mutaxassislar tayyorlash va yuqori qo‘shilgan qiymatga ega ishlab chiqarish zanjirlarini shakllantirish masalalari muhokama qilindi.

Panel munozarasida AQSh Xalqaro taraqqiyotni moliyalashtirish korporatsiyasi va Qozog‘iston Respublikasi Texnologik prognozlash milliy markazi vakillari ishtirok etdi. FLSmidth, Traxys, Cove Capital Investments va Dynamic Aviation kompaniyalari, shuningdek, Colorado School of Mines vakillari o‘z takliflarini taqdim etdi.

Ishtirokchilar foydali qazilmalarni qidirish, qazib olish va qayta ishlashda zamonaviy texnologiyalarni qo‘llash imkoniyatlari yuzasidan fikr almashdi. Yangi loyihalarni moliyalashtirish, texnologik uskunalar yetkazib berish hamda O‘zbekiston korxonalari va amerikalik hamkorlar o‘rtasidagi aloqalarni kengaytirish istiqbollari ko‘rib chiqildi.

Panel muhokamasidan so‘ng B2B va G2B formatidagi uchrashuvlar o‘tkazildi. Ularda davlat idoralari va biznes vakillari istiqbolli loyihalar hamda hamkorlikni rivojlantirish bo‘yicha keyingi amaliy qadamlarni muhokama qilish imkoniyatiga ega bo‘ldi.

C5+1 biznes-forumi raqamli texnologiyalar, ta’lim va sog‘liqni saqlash, mineral resurslar, energetika va transport infratuzilmasi, qishloq xo‘jaligi, to‘qimachilik sanoati, moliya va investitsiyalarga bag‘ishlangan tarmoq sessiyalarini birlashtirdi. Tadbirning asosiy maqsadi Markaziy Osiyo davlatlari va Amerika Qo‘shma Shtatlari o‘rtasidagi to‘g‘ridan-to‘g‘ri ishbilarmonlik aloqalarini kengaytirishdan iborat bo‘ldi.