News

Regional markaziy geologiya tasvirlash ekspeditsiyasida “Butunjahon mehnatni muhofaza qilish kuni” munosabati bilan targ‘ibot-tushuntirish ishlari tashkil etildi. Tadbirda mehnat muhofazasi madaniyatini oshirish, ishlab chiqarish xavfsizligini ta’minlash hamda baxtsiz hodisalarning oldini olish masalalari yuzasidan ma’lumotlar berildi. Shuningdek, navbatdan tashqari yo‘riqnomalar o‘tkazish bo‘yicha tushuntirish ishlari olib borildi. Bundan tashqari, ijtimoiy himoyaga muhtoj hamda ishlab chiqarishda jabrlangan xodimlar oilalaridan xabar olish va ularga moddiy yordam ajratish masalalari ham ta’kidlab o‘tildi.

O‘zbekiston Respublikasi Prezidentining 2026-yil 15-yanvardagi kitobxonlik madaniyatini rivojlantirishga oid qarori ijrosini ta’minlash maqsadida Samarqand markaziy geologiya qidiruv ekspeditsiyasida ishchi-xodimlar o‘rtasida ma’naviy-ma’rifiy ishlar izchil davom ettirilmoqda. Xususan, “Har kuni 20 daqiqa kitob” shiori ostida targ‘ibot tadbirlari tashkil etilib, xodimlarning kitob o‘qishga bo‘lgan qiziqishini oshirishga alohida e’tibor qaratilmoqda. Shuningdek, Zarmitan dala ekspeditsiyasida “Kitob burchagi” tashkil etildi. Ushbu burchak Vatan tarixi, geologiya sohasi hamda ma’naviy-ma’rifiy yo‘nalishdagi ilmiy va badiiy adabiyotlar bilan boyitilgan. Mazkur tashabbus xodimlarning bilim va dunyoqarashini kengaytirish, bo‘sh vaqtini mazmunli tashkil etish hamda intellektual muhitni mustahkamlashga xizmat qiladi.

Joriy yilning 30-aprel kuni O‘zbekiston stol tennisi federatsiyasi hamda “O‘zbek geologiya qidiruv” aksiyadorlik jamiyati hamkorligida yangi sport loyihasi – “UZGEO TABLE TENNIS CLUB” o‘z faoliyatini boshladi. Mazkur tashabbus aholining, ayniqsa Tog‘-kon sanoati va geologiya vazirligi tarkibidagi tashkilotlarda faoliyat olib borayotgan xodimlarning jismoniy faolligini oshirish, sog‘lom turmush tarzini keng targ‘ib etish hamda stol tennisi sport turini yanada ommalashtirishga qaratilgan. Klub faoliyatining yo‘lga qo‘yilishi ushbu yo‘nalishda muhim amaliy qadam bo‘ldi. Tantanali ochilish marosimida federatsiya vakillari, jamiyat rahbariyati, sportchilar hamda ommaviy axborot vositalari ishtirok etib, mamlakatimizda sportni rivojlantirish, ayniqsa tashkilotlar kesimida sport infratuzilmasini kengaytirish muhim ahamiyat kasb etayotgani ta’kidlandi. Yangi tashkil etilgan klub zamonaviy sport jihozlari bilan ta’minlangan bo‘lib, bu yerda muntazam mashg‘ulotlar, ichki birinchiliklar va turli darajadagi musobaqalarni o‘tkazish rejalashtirilgan. Shu bilan birga, istiqbolda iqtidorli sportchilarni aniqlash va ularni professional bosqichga yo‘naltirish ham ko‘zda tutilmoqda. Shuningdek, ochilish doirasida o‘tkazilgan bellashuvlar ishtirokchilarning sportga bo‘lgan qiziqishi va tayyorgarlik darajasi yuqori ekanini yana bir bor namoyon etdi. “UZGEO TABLE TENNIS CLUB” faoliyatining yo‘lga qo‘yilishi jamoalarda sog‘lom muhitni mustahkamlash, sport madaniyatini rivojlantirish hamda stol tennisining ommaviyligini oshirishga xizmat qiladi.Kelajakda aynan shu yerda yangi iste’dodlar kashf etilishi hamda yurtimiz bayrog'ini dunyoga tanitishda xizmat qilishlariga ishonch bildirib qolamiz!

Bugungi kunda “O‘zbek geologiya qidiruv” AJ mamlakatimizda geologiya-qidiruv ishlarini tizimli va ilmiy asosda olib borayotgan yetakchi korxonalardan biri hisoblanadi. Jamiyat tomonidan foydali qazilma konlarini izlash, ularni aniqlash va sanoat miqyosida o‘zlashtirish imkoniyatlarini baholashga qaratilgan keng ko‘lamli ishlar amalga oshirilmoqda. Xususan, korxona mutaxassislari tomonidan geologik va topografik tasvirlash, zamonaviy texnologiyalar asosida burg‘ilash ishlarini olib borish, shuningdek, olingan namunalarni laboratoriya sharoitida chuqur tahlil qilish ishlari yuqori sifat va aniqlik bilan bajarilmoqda. Bu esa yer osti boyliklari zaxiralarini ishonchli baholash va ulardan samarali foydalanish imkonini yaratmoqda. Ayni paytda aksiyadorlik jamiyati uran xom ashyosini qazib olish sohasida ham muhim loyihalarni amalga oshirmoqda. Jumladan, “Navoiyuran” davlat korxonasi bilan hamkorlikda Navoiy viloyatining Sugrali hududida geotexnologik quduqlarni burg‘ilash va ularni foydalanishga topshirish ishlari izchil davom ettirilmoqda. Ushbu loyihalar mamlakatimizning strategik ahamiyatga ega mineral-xom ashyo bazasini mustahkamlashga xizmat qilmoqda. Burg‘ilash ishlari Samarqand markaziy geologiya qidiruv ekspeditsiyasi tarkibidagi Uran partiyasi tomonidan amalga oshirilib, jarayonda zamonaviy burg‘ilash uskunalari va ilg‘or muhandislik yechimlari qo‘llanilmoqda. Mutaxassislar tomonidan har bir quduqning texnik holati, geologik xususiyatlari va ish samaradorligi doimiy nazorat qilib borilmoqda. Shu bilan birga, loyihalarni amalga oshirishda mehnatni muhofaza qilish, texnika xavfsizligi va atrof-muhitni asrash talablariga qatʼiy rioya etilmoqda. Bu esa ish jarayonlarining barqarorligi va xavfsizligini taʼminlashda muhim omil bo‘lib xizmat qilmoqda. Umuman olganda, “O‘zbek geologiya qidiruv” AJ tomonidan amalga oshirilayotgan ishlar mamlakat iqtisodiyotini rivojlantirish, yangi konlarni o‘zlashtirish va eksport salohiyatini oshirishda muhim ahamiyat kasb etmoqda.

Regional markaziy geologiya tasvirlash ekspeditsiyasida Buxgalteriya, iqtisod va moliyalashtirish bo‘limi, moddiy-texnik ta’minot bo‘limi, texnik ishlab chiqarish bo‘limi, elektro-mexanika bo‘limi hamda avtotransport uchastkasi xodimlari uchun manfaatlar to‘qnashuvi va korrupsiyaning oldini olish masalalariga bag‘ishlangan seminar tashkil etildi. Tadbir davomida ishtirokchilarga manfaatlar to‘qnashuvining mazmuni, uning salbiy oqibatlari hamda korrupsiyaga qarshi kurashishning zamonaviy mexanizmlari yuzasidan batafsil ma’lumotlar berildi. Shuningdek, amaldagi qonunchilik talablari, ichki tartib-qoidalarga rioya qilishning ahamiyati va xizmat faoliyatida shaffoflikni ta’minlash masalalari muhokama qilindi. Seminar interaktiv tarzda o‘tkazilib, xodimlar o‘zlarini qiziqtirgan savollarga mutaxassislar tomonidan batafsil javoblar oldilar. Bunday tadbirlar xodimlarning huquqiy ongi va mas’uliyatini oshirishda muhim ahamiyat kasb etishi ta’kidlandi.

Joriy yilning 28-aprel kuni “O‘zbek geologiya qidiruv” aksiyadorlik jamiyatida Butun jahon mehnatni muhofaza qilish kuniga bag‘ishlangan davra suhbati tashkil etildi. Mazkur tadbirda jamiyat va uning tizimidagi mehnatni muhofaza qilish bo‘yicha masʼul xodimlar, kasaba uyushmasi raislari hamda faollar ishtirok etdi. Davra suhbatining asosiy maqsadi – “Xavfsiz va sog‘lom mehnat – barqaror rivojlanish kafolati” g‘oyasini keng targ‘ib qilish, ish joylarida xavfsiz mehnat sharoitlarini taʼminlash hamda xodimlar o‘rtasida mehnatni muhofaza qilish madaniyatini yuksaltirishdan iborat bo‘ldi. Tadbir doirasida mehnatni muhofaza qilish sohasidagi qonunchilik, xususan O‘zbekiston Respublikasi Vazirlar Mahkamasining 819-son qarori mazmun-mohiyati atroflicha tushuntirildi. Shuningdek, ishlab chiqarishdagi mavjud muammolar muhokama qilinib, ularni bartaraf etish bo‘yicha amaliy takliflar ilgari surildi. Davra suhbatida baxtsiz hodisalarning oldini olish, jamoatchilik nazoratini kuchaytirish va xodimlarda xavfsiz mehnat madaniyatini shakllantirish masalalariga alohida eʼtibor qaratildi. Mutaxassislar taʼkidlaganidek, mehnatni muhofaza qilish sohasida tizimli ishlar olib borish ishlab chiqarish samaradorligini oshirish va inson hayotini asrashda muhim ahamiyat kasb etadi.

Toshkent markaziy geologiya qidiruv ekspeditsiyasi tarkibidagi Sharqiy-Qurama dala ekspeditsiyasi tomonidan Qizilolmasoy ma’danli maydonining Uchbuloq uchastkasida geologik qidiruv ishlari boshlandi. Mazkur hududda dastlab geologiya izlash marshrutlari tashkil etilib, maydonning geologik tuzilishi, minerallashuv belgilari hamda istiqbolli zonalarni aniqlash ishlari olib borilmoqda. Barcha jarayonlar zamonaviy yondashuvlar asosida tizimli ravishda amalga oshirilmoqda. Shu bilan birga, Markaziy geologiya-geofizika ekspeditsiyasi bilan shartnoma asosida hamkorlik yo‘lga qo‘yilib, yer usti geofizik tadqiqotlar, xususan magnit qidiruv usuli orqali ishlar bajarilmoqda. Ushbu usul yer osti geologik tuzilmalarini o‘rganish va ma’danlashgan zonalarni aniqlashda muhim ahamiyatga ega. Loyiha doirasida olingan natijalar hududning mineral-xom ashyo salohiyatini yanada chuqur o‘rganish va yangi istiqbolli konlarni aniqlashga xizmat qilishi kutilmoqda.

“O‘zbek geologiya qidiruv” AJ nomidan yurtimizda hamda tizimimizda faoliyat yuritayotgan barcha mehnat muhofazasiga mas’ul xodimlarni ushbu kasb bayrami bilan samimiy tabriklaymiz. Sizning fidokorona mehnatingiz tufayli har bir xodim ishga kelib, kun yakunida o‘z uyiga sog‘-omon qaytmoqda. Har bir oldi olingan xavf, har bir asrab qolingan hayot ortida sizlarning bilimingiz, mas’uliyatingiz va qat’iyatingiz mujassam. Sizlarga mustahkam sog‘liq, kuch-g‘ayrat va sharafli kasbingizda ulkan muvaffaqiyatlar tilaymiz.  Bayramingiz muborak bo‘lsin!

2026-yil 28-aprel kuni “O‘zbek geologiya qidiruv” AJ tomonidan Telegram ijtimoiy tarmog‘idagi rasmiy sahifa orqali fuqarolar bilan navbatdagi onlayn muloqot tashkil etildi. Mazkur muloqot davomida fuqarolar tomonidan yo‘llangan savollarga soha mutaxassislari tomonidan batafsil va atroflicha javoblar berildi. Suhbat ochiq va samimiy ruhda o‘tdi. Shu bilan birga, geologiya qidiruv ekspeditsiyalarida faoliyat yuritayotgan xodimlarning taklif va mulohazalari tinglandi hamda ularni amaliyotga joriy etish masalalari muhokama qilindi. “O‘zbek geologiya qidiruv” AJ tomonidan bunday ochiq muloqotlar muntazam ravishda tashkil etilib, fuqarolar bilan samarali aloqa o‘rnatish, shuningdek, soha faoliyatini yanada takomillashtirishga xizmat qilmoqda.