Акционерное общество «УЗБЕКГЕОЛОГОРАЗВЕДКА»

Hisor markaziy geologiya qidiruv ekspeditsiyasi Surxondaryo dala ekspeditsiyasining Vodniy soy uchastkasida geologik-qidiruv ishlari belgilangan reja asosida olib borilmoqda.Mazkur ishlar yurtimiz mineral-xom ashyo bazasini rivojlantirish va qayta tiklash davlat dasturi loyihasi hamda “Olmaliq KMK” AJ bilan tuzilgan qo‘shma hamkorlik asosida amalga oshirilmoqda. Loyihadan asosiy maqsad — Xondiza ma’danli maydonidagi “Vodniy soy” uchastkasida polimetall ma’dan resurslari va zaxiralarini oshirishdan iborat. Xondiza polimetall koni Hisor tog‘ tizmasining janubiy-g‘arbiy qismidagi Surxontog‘ tog‘larining markaziy hududida joylashgan bo‘lib, geografik jihatdan Surxondaryo viloyati Sariosiyo tumaniga to‘g‘ri keladi.Bugungi kunda uchastkada yer osti tog‘ lahm o‘tish hamda yer osti burg‘ilash ishlari olib borilmoqda. O‘tilgan lahmlardan geologik namunalar olinib, tahlil ishlari amalga oshirilmoqda.Shuningdek, kelgusida mavjud zaxiralarni yanada ko‘paytirish maqsadida yer osti lahm o‘tish va burg‘ilash ishlari jadallik bilan davom ettirilmoqda.

Geologiya fanlari universitetida mehnat yarmarkasi tashkil etildi. Tadbirda geologiya va konchilik sohalaridagi yetakchi tashkilotlar ishtirok etib, talabalar uchun keng imkoniyatlar yaratildi. Yarmarka davomida bitiruvchi hamda yuqori kurs talabalari o‘z qiziqishlari doirasidagi korxonalar vakillari bilan bevosita muloqot qilib, amaliyot o‘tash va ishga joylashish imkoniyatlari haqida batafsil ma’lumotlarga ega bo‘lishdi. Xususan, “O‘zbek geologiya qidiruv” AJ vakillari tomonidan kompaniya faoliyati, mavjud bo‘sh ish o‘rinlari hamda nomzodlarga qo‘yiladigan talablar yuzasidan tushuntirishlar berildi. Mazkur mehnat yarmarkasi talabalar uchun o‘z kasbiy yo‘nalishini aniq belgilash, kelajak rejalari ustida ishlash va nufuzli tashkilotlarda faoliyat boshlash sari muhim qadam bo‘ldi.

Joriy yilning 22-may kuni “O‘zbek geologiya qidiruv” AJga yuridik va jismoniy shaxslarning murojaatlari va ularni qiziqtirayotgan savollari bo‘yicha o‘tkazilgan onlayn muloqot savol-javoblari asosida samarali bo‘lib o‘tdi. Muloqot jamiyat rasmiy telegram sahifasida tashkil etilib, muloqot davomida korxona tizimida murojaatlar bilan ishlash holati va tizimda amalga oshirilayotgan ishlar bo‘yicha ma’lumot berib o‘tildi.

O‘zbekiston Respublikasi Prezidentining 2025-yil 20-oktyabrdagi PQ-310-sonli Qarori ijrosini ta’minlash hamda korxonada favqulodda vaziyatlarda xavfsizlik madaniyatini yanada yuksaltirish maqsadida Qizilqum markaziy geologiya qidiruv ekspeditsiyasi injener-texnik xodimlari ishtirokida o‘quv-amaliy mashg‘uloti tashkil etildi. Mashg‘ulot Navoiy viloyati Favqulodda vaziyatlar boshqarmasi hamda Zarafshon shahar FVB malakali mutaxassislari hamkorligida yuqori saviyada o‘tkazildi. Unda favqulodda vaziyatlarda to‘g‘ri harakat qilish, tezkor evakuatsiya, birinchi yordam ko‘rsatish hamda yong‘in xavfsizligi bo‘yicha amaliy ko‘nikmalar mustahkamlandi. Tadbir davomida ishtirokchilarga xavfsizlik qoidalariga rioya etish, favqulodda holatlarning oldini olish va yuzaga kelgan vaziyatlarda tezkor hamda samarali harakat qilish yuzasidan tavsiyalar berildi.

2026-yil 19-20-may kunlari Yevropa Ittifoqi – O‘zbekiston CRM loyihasini ishga tushirish doirasida Tog‘ - kon sanoati va geologiya vazirligi, “O‘zbek geologiya qidiruv” AJ, “Yer qa’ridan foydalanish markazi” DM, “Mineral resurslar instituti” DM hamda “O‘zbekiston texnologik metallar kombinati” AJ mutaxassislari hamda EuroGeoSurveys — Finlyandiya Geologiya xizmati (GTK), Chexiya Geologiya xizmati (ČGS), Fransiya Geologiya xizmati (BRGM), Polsha milliy geologiya tadqiqot instituti (PGI-NRI), Germaniya geologiya fanlari va tabiiy resurslar federal instituti (BGR) shuningdek, Yevropa Ittifoqining O‘zbekistondagi vakolatxona vakillari ishtirokida “O‘zbekistonda muhim xomashyo materiallari (CRM) bo‘yicha foydali qazilmalarni qidirishni qo‘llab-quvvatlash uchun geologik tadqiqotlarni rivojlantirish” mavzusida tadbir bo‘lib o‘tdi. Uchrashuv davomida geologiya sohasida amalga oshirilayotgan tadqiqotlar namoyish etilib, kelgusida qo‘shma tadqiqotlarni olib borish ishlari muhokama qilindi.

Zarafshon shahar hokimi Rahmanov Nazirbek Israilovich  va Qizilqum markaziy geologiya qidiruv ekspeditsiyasi boshlig‘i Tursunov Elbek Elmurodovichlar korxonada ishlayotgan ishchi xodimlar va Daugiztau qo‘rg‘oni aholisi bilan uchrashib, ularning muammolari bilan yaqindan tanishdi. Sayyor qabul davomida ishchi-xodimlarning mehnat sharoitlari, ularni qiynayotgan muammo va takliflar tinglanib, mavjud masalalarni hal etish yuzasidan tegishli vazifalar belgilab olindi.   Qabulda fuqarolarning murojaatlari soha mutaxassislarini jalb qilgan holda chuqur oʼrganildi, muammoli masalalarning bir qismi joyida hal qilindi, ayrim yechimi muayyan muddat talab qiladigan arizalar ijrosi qatʼiy nazoratga olindi.

"O‘zbek geologiya qidiruv" AJ tomonidan burg‘ilash ishlarida muhim ahamiyatga ega bo‘lgan burg‘ilash eritmalarining texnologik sifatini aniq o‘lchashga xizmat qiluvchi zamonaviy laboratoriya anjomlari xarid qilindi. Uran texnologik partiyasida mazkur laboratoriya uskunalaridan samarali va to‘g‘ri foydalanish bo‘yicha korxona texnologlari uchun nazariy hamda amaliy o‘quv mashg‘ulotlari tashkil etildi. Mashg‘ulotlar davomida burg‘ilash eritmalarining sifat ko‘rsatkichlarini aniqlash, tahlil qilish va texnologik jarayonlarda qo‘llash bo‘yicha mutaxassislarga zarur tushuncha va amaliy ko‘nikmalar berildi.

Aksiyadorlik jamiyati Korrupsiyaga qarshi ichki nazorat xizmati xodimlari yillik dastur doirasida “CERT academy” xalqaro auditorlik kompaniyasi tomonidan “ISO 37001:2025 bo‘yicha Korrupsiyaga qarshi menejment tizimini boshqarish” xalqaro standarti asosida o‘qitilmoqda. O‘quv jarayonida xodimlarga amaliyotda qo‘llash mumkin bo‘lgan zamonaviy bilim va ko‘nikmalar berilmoqda. Shuningdek, xalqaro standart doirasiga kiritilgan yangi talablar va ularning amaliy ahamiyati keng yoritilmoqda. Mazkur o‘quvlar tizimda korrupsiyaga qarshi kurashish mexanizmlarini yanada takomillashtirish, shaffoflik va samaradorlikni oshirishga xizmat qiladi.

Hisor Markaziy geologiya qidiruv ekspeditsiyasining Qashqadaryo dala ekspeditsiyasida 161-sonli burg‘ilash brigadasi tomonidan Shimoliy Akba uchastkasida oltinga geologik qidiruv ishlari olib borilmoqda. Loyiha doirasida jami 3 890 p.m. burg‘ilash hamda 2 760 m³ yer usti tog‘-kon ishlarini amalga oshirish rejalashtirilgan. Ayni paytda belgilangan yillik reja ijrosini o‘z vaqtida yakunlash maqsadida barcha zarur texnika va imkoniyatlar safarbar etilgan holda ishlar izchil davom ettirilmoqda.